रुकुम पश्चिमको सानीभेरी गाउँपालिकाले यो वर्षको सातौँ राष्ट्रिय मौराखारा गुरिल्ला म्याराथन भव्य बनेको निष्कर्ष निकालेको छ । गाउँ कार्यपालिका बैठकले यो संस्करण गत संस्करणहरू भन्दा सबै हिसाबले भव्य रहेको निष्कर्ष निकालेको हो । 

राष्ट्रिय खेलाडीहरूको सहभागिता, अतिथिको सहभागिता, खर्च व्यवस्थापन देखि जनसहभागिताका हिसाबले यो संस्करण भव्य रूपमा सफल भएको निष्कर्ष निकालिएको गाउँ कार्यपालिका प्रवक्ता पहलसिंह घर्तीले जानकारी दिनुभयो । सानीभेरी गाउँपालिकाले हरेक वर्षको फागुन १ गते जनयुद्ध दिवसको अवसरमा राष्ट्रिय स्तरको मौराखारा–सानीभेरी गुरिल्ला म्याराथन आयोजना गर्दै आएको छ । 

यसबाहेक कार्यपालिका बैठकले विभिन्न शीर्षकमा विनियोजित रकम रकमान्तर गर्ने, शिक्षा समितिको निर्णय अनुमोदन गर्ने निर्णय सहित गाउँ सभाको हिउँदे अधिवेशनको सूचि तयार पारेको छ । कार्यपालिका बैठकले गाउँ सभाको हिउँदे अधिवेशनका सूचि तयार पारेको छ भने सडक तथा सार्वजनिक मापदण्ड २०८१ समेत पारित गरेको छ । 

त्यस्तै गाउँपालिकाको अर्धवार्षिक सार्वजनिक सुनुवाइ फागुन २८ गते र अर्धवार्षिक समीक्षा चैत्र ३ गते गर्ने, लेखा समितिबाट पारित भएको नियमित तथा प्रमाण पेस गर्नुपर्ने बेरुजुका सम्बन्धमा छलफल सहित आगामी गाउँ कार्यपालिका बैठकमा गाउँपालिकाको अर्धवार्षिक आय व्यय पेस गर्ने पनि निर्णय भएको गाउँ कार्यपालिकाका प्रवक्ता घर्तीले जानकारी दिनुभयो । 

हालसम्मका कार्यपालिका निर्णयहरू अनुमोदनका लागि गाउँ सभामा पेस गर्ने र विपत् समितिका निर्णयहरू गाउँ सभाबाट अनुमोदन गर्ने समेत निर्णय भएको घर्तीले बताउनुभयो ।