जाजरकोटका नवराज महर कुवेतमा बिरामीले थला परेका छन् । जिल्ला नलगाड नगरपालिका १ का नवराज एक महिना अघि ३ लाख खर्चिएर लिङ्क इन्टरनेशनल म्यानपावर मार्फत कुवेत पुग्नुभएको थियो । हस्पिटलको काम भनेर झुक्काएर म्यानपावरले नवराजलाई ग्यास कम्पनीमा काममा लगाएको बताइएको छ । नवराज एक साता देखि शक्त बिरामी पर्नुभएको छ ।

थाइराइडको समस्याले नवराजलाई निकै सताइरहेको र उद्धारको आवश्यकता रहेको नवराजका साथी रमेश केसीले बताउनुभयो । हाल साथीको कोठामा रहेका नवराज बिरामीले निकै थलिएको उहाँको भनाई छ । कुवेतबाट प्राप्त भिडिओमा नवराज निकै छटपटाइरहेको देखिन्छ । साथीहरूले तत्कालै उद्धारको माग गरिरहेका छन् ।

‘म्यानपावर कम्पनीले एउटा भनेर अर्को काममा लगाएर ठगेको र अहिले नवराज गम्भीर अवस्थाबाट गुज्रिरहेकोले उसको तत्काल उद्धारको आवश्यकता छ, नवराजका साथी रमेशले भन्नुभयो ।’ ऋण लिएर कुवेत पुगेका नवराजको परिवारको पहलमा उद्धारको सम्भावना नभएको भन्दै उहाँले नेपाल सरकार तथा सरोकारवाला निकायलाई उद्धार गरिदिन आग्रह गर्नुभयो ।