ग्रामीण विकास सञ्चार केन्द्रद्वारा सञ्चालित सामुदायिक रेडियो शारदा एफएम ९९.२ मेगाहर्ज आजबाट १७ औँ वर्षमा प्रवेश गरेको छ । वि.सं. २०६५ फागुन १२ गते “परिवर्तन र शान्तिका लागि रेडियो“ भन्ने नारासहित सल्यान जिल्लाकाे सदरमुकाम खलंगामा स्थापना भएको रेडियो शारदा एफएमले सूचना, शिक्षा, मनोरञ्जन, सामाजिक रूपान्तरण, नागरिक सशक्तीकरण तथा सुशासन प्रवर्द्धनको क्षेत्रमा उल्लेखनीय योगदान दिँदै आएको छ ।

यस अवसरमा रेडियो शारदा एफएमले श्रोता, कर्मचारी, पत्रकार, स्थानीय संवाददाता, विज्ञापनदाता तथा सम्पूर्ण शुभेच्छुकहरू प्रति आभार व्यक्त गर्दै आगामी दिनहरूमा पनि निरन्तर साथ र सहयोगको अपेक्षा गरेको छ । रेडियो सञ्चालक संस्थाका अध्यक्ष तथा स्टेसन म्यानेजर प्रतीक इच्छुक शर्माले शुभकामना सन्देश जारी गर्दै सूचना प्रविधिको तीव्र विकाससँगै रेडियो शारदा एफएमले डिजिटल प्लेटफर्मसँगको एकीकरण गर्दै नवीनतम सामग्री उत्पादन गर्ने उल्लेख गर्नुभएको छ ।  

जारी सन्देशमा स्थानीय आवाजलाई प्राथमिकता दिने रेडियोको विशेषतालाई जगेर्ना गर्दै सूचना सम्प्रेषणको परम्परागत विधिलाई आधुनिक प्रविधिसँग समायोजन गर्ने प्रतिबद्धता व्यक्त गरिएको छ । भूकम्प, बाढी पहिरो, महामारीजस्ता विपत्तिका समयमा सबैभन्दा उपयोगी सूचना स्रोतको रूपमा रेडियो शारदा एफएमले महत्त्वपूर्ण भूमिका निर्वाह गर्दै आएको सन्देशमा उल्लेख छ । 

स्थानीय समुदायका आवाजलाई प्राथमिकता दिँदै, समाजका विविध तह र वर्गका समस्याहरू उजागर गर्दै समाधान खोज्ने अभियानलाई रेडियो शारदा एफएमले निरन्तरता दिने बताइएको छ । अध्यक्ष तथा स्टेसन म्यानेजर शर्माले १७औँ वार्षिकोत्सवको अवसरमा सम्पूर्ण शुभेच्छुकहरूलाई शुभकामना समेत व्यक्त गर्नुभएको छ ।