रुकुम पश्चिमको मुसिकोट नगरपालिकाका महिलालाई अचार बनाउने तालिम दिएको छ । उद्योग तथा उपभोक्ता हित संरक्षण कार्यालयले महिलालाई आत्मनिर्भर बनाउन अचार बनाउने तालिम प्रदान गरेको  हो । नगरभित्रका १४ जना महिलालाई अचार बनाउने तालिम सिकाएको उद्योग तथा उपभोक्ता हित संरक्षण कार्यालयका प्रमुख रमेश ओलीले जानकारी दिनुभयो ।

 उहाँका अनुसार उद्योग तथा उपभोक्ता हित संरक्षणको कार्यालयमा १० दिनसम्म अचार बनाउने तालिम सिकाएको हो । महिलालाई आत्मनिर्भर बनाउन तथा व्यवसायमा आकर्षण गर्न निःशुल्क अचार बनाउने तालिम प्रदान गरिएको उहाँले बताउनुभयो । तालिम १० दिनसम्म सञ्चालन भएर आइतबार एक कार्यक्रमका बिच सहभागीहरूलाई प्रमाणपत्र प्रदान गरी समापन गरिएको प्रमुख ओलीले जानकारी दिनुभयो । 

उद्योग तथा उपभोक्ता हित संरक्षण कार्यालयबाट प्रत्येक स्थानीय तहमा दुई / दुई वटा सीपमूलक तालिम रहेका छन् । केही स्थानीय तहमा तालिम सम्पन्न गरिसकिएको र केही स्थानीय तहमा तालिम हुन बाँकी रहको कार्यालयले जनाएको छ । हिजो मात्रै सानीभेरी गाउँपालिकामा एडभान्स सिलाई कटाई तालिम सकिएको कार्यालय जनाएको छ । 

तालिमहरूमा सहभागी हुन चाहने व्यक्तिहरूको कार्यालयमा आवेदन न्यून मात्रमा पेस हुने गरेकाले पटक पटक सूचना निकाल्नु पर्ने र तालिम सञ्चालन गर्न समेत समस्या हुने गरेको उद्योग तथा उपभोक्ता हित संरक्षण कार्यालय रुकुम पश्चिमले जनाएको छ ।