रुकुम पश्चिमको मुसिकोटमा खुला ब्याडमिन्टन प्रतियोगिताकाे तेस्रो संस्करण सुरु भएको छ । जिल्ला ब्याडमिन्टन संघ रुकुम पश्चिमले प्रतियोगिता आयोजना गरेको हो । प्रतियोगिताको मुसिकोट नगर प्रमुख महेन्द्र केसीले उद्घाटन गर्नुभयो ।

जिल्लामा एकै पटक ५ वटा इभेन्टमा पहिलो पटक प्रतिस्पर्धा हुन लागेको हो । अल नेपाल खुला पुरुष डबल्स (वरियता बाहेक), रुकुम पश्चिम खुला पुरुष डबल्स, महिला खुला डबल्स, कर्णाली प्रदेश खुला डबल्स र रुकुम पश्चिम १९ वर्ष मुनिको सिङ्गल तर्फ प्रतिस्पर्धा हुन लागेको जिल्ला ब्याडमिन्टन सङ्घका अध्यक्ष अनिल बुढाले जानकारी दिनुभयो ।

प्रतियोगिताको उद्घाटन गर्दै नगर प्रमुख केसीले ब्याडमिन्टन विकासमा जिल्ला ब्याडमिन्टन संगले पुर्याएकाे योगदानको चर्चा गर्नुभयो । ब्याडमिन्टन विकासमा नगरपालिकाले संघ सँग समन्वय गर्ने समेत उहाँले बताउनुभयो । जिल्ला ब्याडमिन्टन सङ्घका अध्यक्ष अनिल बुढाको अध्यक्षतामा भएको कार्यक्रममा नगर प्रमुख केसीको प्रमुख आतिथ्यता रहेको थियो ।

कार्यक्रममा जिल्ला खेलकुद विकास समितिका अध्यक्ष शैलेशकुमार शर्मा, त्रिवेणी गाउँपालिका अध्यक्ष गणेशकुमार केसी, प्रमुख जिल्ला अधिकारी कुलबहादुर जिसी, नेपाल ब्याडमिन्टन सङ्घका केन्द्रीय सदस्य डम्बर थापा र कर्णाली प्रदेश ब्याडमिन्टन सङ्घका अध्यक्ष टक्कबहादुर शाहीको विशेष आतिथ्यता रहेको थियो ।

त्यस्तै कार्यक्रममा सशस्त्र प्रहरी बल नम्बर ४७ गुल्मका गुल्मपति सशस्त्र प्रहरी नायब उपरीक्षक मदन धानुक, जिल्ला प्रहरी कार्यालयका निमित्त प्रमुख प्रहरी निरीक्षक ऋषि पाठक, प्रमुख अनुसन्धान अधिकृत चिरञ्जीवी बुढामगर, नेपाली काँग्रेसका जिल्ला सचिव परमेश्वर भण्डारी, नेकपा माओवादी केन्द्रका मुसिकोट अध्यक्ष दलबहादुर खड्का लगायतको आतिथ्यता रहेको थियो ।

सङ्घका उपाध्यक्ष लक्ष्मण ओलीको स्वागत मन्तव्य रहेको कार्यक्रमको सञ्चालन सचिव विशाल विष्टले गर्नुभएको थियो ।

कुन बिधामा कति पुरस्कार ?

प्रतियाेगिता अन्तर्गत अल नेपाल खुला ब्याडमिन्टनको विजेता जोडीले ५२ हजार नगद, ट्रफि, मेडल र प्रमाण पत्र प्राप्त गर्दा उपविजेता जोडीले ३१ हजार नगद, ट्रफि, मेडल र प्रमाणपत्र प्राप्त गर्ने छन् । सान्त्वना दुई जोडीलाई समान ११/११ हजार पुरस्कारको व्यवस्था गरिएको छ । 

रुकुम पश्चिम जिल्ला स्तरीय खुला पुरुष डबल ब्याडमिन्टनको विजेता जोडीले ३० हजार र उपविजेता जोडीले २० हजार नगद, ट्रफि, मेडल र प्रमाण पत्र प्राप्त गर्ने छन् । सान्त्वना दुई जोडीले समान ५/५ हजार पुरस्कार पाउने छन् । त्यस्तै महिला तर्फको विजेता जोडीले १५ हजार, उप विजेताले ८ हजार र सान्त्वना जोडीले समान ३/३ हजार पुरस्कार पाउने जिल्ला ब्याडमिन्टन सङ्घका सचिव विशाल विष्टले जानकारी दिनुभयो ।  

कर्णाली प्रदेश खुला पुरुष डबल ब्याडमिन्टनको विजेताले ३२ हजार, उप विजेताले २० हजार र सान्त्वना हुने दुई जोडीले समान ६/६ हजार पुरस्कार पाउने सचिव विष्टले बताउनुभयो ।

रुकुम पश्चिम जिल्ला स्तरीय १९ वर्ष मुनिको पुरुष सिङ्गल ब्याडमिन्टनको विजेताले १५ हजार, उप विजेताले ८ हजार र सान्त्वना हुने दुई खेलाडीले समान ३/३ हजार पुरस्कार पाउने छन् । त्यस्तै सबै इभेन्टका एक/एक जना वेष्ट प्लेयरलाई २५ सय नगद, मेडल र प्रमाणपत्र प्रदान गरिने आयाेजकले जनाएकाे छ ।