रुकुम पश्चिमको मुसिकोट नगरपालिका वडा नम्बर १ खलंगामा जारी खुला डबल्स व्याडमिन्टन प्रतियोगिता तेस्रो संस्करण अन्तर्गत अल नेपाल खुला पुरुष डबल्स ब्याडमिन्टन (बरियता बाहेक)मा रूकुम पश्चिमकाे नवराज मल्ल र मुस्कान केसीको जोडी विजेता बनेको छ । बिहिबार भएको फाइनलमा दाङको हिमांशु कँवर र विवेक चौधरीको जोडीलाई ३–१ को सेटमा पराजित गर्दै नवराज र मुस्कानको जोडी विजेता बनेको हो ।

प्रतिस्पर्धात्मक खेलमा पहिलो सेट २२–२० ले गुमाएपनि त्यसपछिका २ सेट भने आफ्नो पक्षमा पार्दै नवराज र मुस्कानको जोडीले फाइनल जित्यो । दोस्रो सेट २१–१८ मा जितेको यो जोडीले तेस्रो सेट २२–२४ ले जित्न सफल भयो । कुल २४ जोडीले प्रतिस्पर्धा गरेको प्रतियोगितामा विजेता बन्दै नवराज र मुस्कानको जोडीले ५२ हजार नगद र ट्रफी हात पारेको जिल्ला ब्याडमिन्ट संघका अध्यक्ष अनिल बुढाले जानकारी दिनुभयो ।

उहाँका अनुसार उप विजेता हिमांशु र विवेकको जोडीले ३१ हजार नगद र ट्रफीमा चित्त बुझायो । इश्वर रावल र शिखर केसी तथा सुर्खेतको ठगेन्द्र खत्री र कृष्ण रानाको जोडी सान्त्वना भयो । उक्त दुई जोडीले समान ११÷११ हजार नगद हात पारेको अध्यक्ष बुढाले बताउनुभयो । स्थान हासिल गर्ने खेलाडीलाई मेडल र प्रमाण पत्रको समेत व्यवस्था रहेको उहाँको भनाई छ ।

प्रतियोगिता अन्तर्गत ५ वटा इभेन्टमा प्रतिस्पर्धा भइरहेको छ । अल नेपाल खुला पुरुष डबल्स इभेन्टको प्रतिस्पर्धा सकिएकामा कर्णाली प्रदेश स्तरीय पुरुष डबल्स, रुकुम पश्चिम जिल्ला स्तरीय पुरुष तथा महिला डबल्स र रुकुम पश्चिम जिल्ला स्तरीय यु–१९ पुरुष सिंगल इभेन्टमा प्रतिस्पर्धा जारी रहेको आयोजक जिल्ला ब्याडमिन्टन संघले जनाएको छ । जिल्लाको ब्याडमिन्टन विकासका लागि प्रतियोगिता आयोजना गरिएको बताइएको छ । आयोजकका अनुसार यो प्रतियोगिताको तेस्रो संस्करण हो ।