विज्ञापन बोर्डका अध्यक्ष लक्ष्मण हुमागाईँले विज्ञापनका क्षेत्रमा देखिएका विकृतिका विरुद्ध डटेर लागिरहेको बताउनुभएको छ । आज रुकुम पश्चिमको सदरमुकाम खलङ्गामा भएको विज्ञापनको नियमन, लोक कल्याणकारी विज्ञापन लगाएका विषयक अन्तरक्रिया कार्यक्रममा बोल्दै उहाँले विज्ञापनका क्षेत्रमा विभिन्न विकृतिहरू रहेको र त्यसका विरुद्धमा काम गरिरहेको बताउनुभएको हो । 

फलस्वरूप धेरै विकृतिहरू नियन्त्रण भएको उहाँको भनाई छ । ‘म विज्ञापन बोर्डमा आइसकेपछि मिडियाको दिगोपनाका लागि काम गरिरहेका छौँ, विज्ञापन क्षेत्रमा धेरै विकृतिहरू थिए, विज्ञापन एजेन्सीहरू मोटाउने तर मिडियाहरू सुक्दै जाने परिपाटीको अन्त्यका लागि खटिइरहेका छौँ, धेरै विकृति नियन्त्रण भएका छन्, उहाँले भन्नुभयो ।’

यसअघि राष्ट्रिय मिडियामा छापिनुपर्ने विज्ञापनमा एजेन्सीहरूले मनलाग्दी बिल बनाएर पठाउने परिपाटीलाई हाल विज्ञापन छापेको सम्बन्धित मिडियाकै बिल पठाउने गरी व्यवस्था गरेकोले यसले धेरै हदसम्म बिचौलियाको चलखेल अन्त्य हुने विश्वास व्यक्त गर्नुभयो । यसबारेमा महालेखा परीक्षकको कार्यालयलाई समेत लेखि पठाएको र कार्यालयले पनि यसमा गम्भीरता देखाएको उहाँको भनाई छ । 

त्यस्तै उहाँले गलत काम गर्ने विज्ञापन एजेन्सीहरूलाई कारबाही गरिरहेको जानकारी गराउनुभयो । मिडिया बाँच्ने मुख्य आधार नै विज्ञापन भएको भन्दै उहाँले विज्ञापनको समानुपातिक वितरणको आवश्यकता औँल्याउनुभयो । खरिद ऐनले टेन्डरका विज्ञापन राष्ट्रिय पत्रिकामा छाप्नुपर्ने व्यवस्था गरेको हालसम्म सम्म सोही अनुसार भइरहेको र अन्य विज्ञापनको हकमा भने स्थानीय मिडियाहरूलाई प्राथमिकता दिनुपर्ने उहाँले बताउनुभयो । 

कार्यक्रममा सहभागी पत्रकारहरूले विज्ञापनमा स्थानीय मिडियाहरूलाई विभेद गरिएको, विज्ञापनको समानुपातिक वितरण हुन नसकेको, लोक कल्याणकारी विज्ञापनमा थप कर काट्ने गरिएको, पत्रकारका नाममा मनलाग्दी विज्ञापन लगायतका सेवा सुविधा माग गर्ने जस्ता गतिविधिहरू भइरहेको भन्दै बोर्डको ध्यानाकर्षण गराएका थिए । 

प्रमुख जिल्ला अधिकारी कुलबहादुर जिसीको अध्यक्षतामा भएको कार्यक्रममा बोर्डका अध्यक्ष लक्ष्मण हुमागाईँको प्रमुख आतिथ्यता रहेको थियो । त्यस्तै कार्यक्रममा विज्ञापन बाेर्डका प्रमुख प्रशासकीय अधिकृत देवी पाण्डे खत्री, शाखा अधिकृतहरु बाबुराम पाण्डे, प्रकाशचन्द्र अधिकरी, गणेश बुढाथाेकी, पत्रकार महासङ्घका अध्यक्ष गोपालप्रसाद रेग्मी, पत्रकारका सङ्घ सङ्गठन तथा जिल्लास्थित क्रियाशील पत्रकारहरूको उपस्थिति रहेको थियो । महासङ्घका उपाध्यक्ष देवकुमार ओलीको स्वागत मन्तव्य रहेको कार्यक्रमको सञ्चालन महासङ्घका सचिव दीपेन्द्र महताराले गर्नुभएको थियो ।।