नेकपा माओवादी केन्द्र रुकुम पश्चिमको जिल्ला समन्वय समितिको बैठक सम्पन्न भएको छ । जिल्ला पार्टी कार्यालय शेरिगाउँमा बसेको बैठकले जिल्ला स्तरीय स्थानीय सत्ता सञ्चालन समन्वय समिति गठन गरेको छ । 

पार्टीले नेतृत्व गरेका स्थानीय सरकार सञ्चालनमा सहयोग गर्ने उद्देश्यले समन्वय समिति गठन गरिएको नेकपा माओवादी केन्द्र जिल्ला समन्वय समिति रुकुम पश्चिमका संयोजक गोविन्द रोका सचिनले जानकारी दिनुभयो । 

उहाँका अनुसार उक्त समितिको संयोजकमा पार्टी जिल्ला इन्चार्ज रहेकामा जिल्ला संयोजक, सङ्गठन विभाग प्रमुख, जिल्ला समन्वय समिति प्रमुख र उपप्रमुख, पालिका सरकार प्रमुख÷स्थानीय तह दल नेता, पार्टीका पालिका इन्चार्ज र अध्यक्षहरू सदस्य सहित २३ सदस्यीय रहेको छ । 

पूर्व जिल्ला समन्वय समिति प्रमुख तथा पूर्व पालिका प्रमुखहरू यस समितिको विज्ञ सल्लाहकारको रूपमा रहने निर्णय बैठकले निर्णय गरेको छ । 

बैठकले जिल्ला समितिमा मनोनीत समेत गरेको छ । यसअघि जिल्ला समन्वय समितिको पदेन सदस्य रहेका तर हाल कुनै पनि समितिमा नरहेका र पालिका अधिवेशनमा चुनावी प्रतिस्पर्धामा पनि सामेल नरहेकालाई जिल्ला समन्वय समितिमा कायम राख्ने निर्णय भएको संयोजक रोकाले बताउनुभयो । जसअनुसार हिरा थापा, डिलबहादुर सार्की उत्तम, खुमबहादुर खड्का, कर्णबहादुर खड्का, निर्मलकुमार पुन, बुद्धिप्रसाद बुढा र हर्कु मल्ललाई मनोनीत गरिएको छ । 

साथै पालिका अधिवेशन प्रयोजनको लागि जिल्ला समन्वय समितिबाट राजीनामा दिएका लोकेन्द्र यरी, तुल देवकोटा, दीपक केसी, वीरबहादुर डाँगी, सौरभ केसी र लालबहादुर बुढाको राजीनामा स्वीकृत गरी रिक्त स्थानमा सुशीला शाह, बेगम देवकोटा, कलबहादुर कँवर र खडकबहादुर घर्तीलाई मनोनीत गरी अनुमोदनका लागि प्रदेश समितिमा पठाउने निर्णय भएको संयोजक रोकाको भनाई छ । 

त्यस्तै आवश्यकता अनुसार जवस/मोर्चाका जिल्ला सम्मेलन/भेला/बैठकहरू सम्पन्न गर्ने, फागुन २८ र २९ गते बुटवलमा आयोजना गरिएको मगर राष्ट्रिय मुक्ति मोर्चाको राष्ट्रिय सम्मेलनमा १२ जना प्रतिनिधि र ३ जना पर्यवेक्षक पठाउने, पार्टी विधान अनुसार प्रदेशसभा निर्वाचन क्षेत्र समन्वय समिति गठन गरी केन्द्रीय समिति बैठकद्वारा पारित राजनैतिक प्रतिवेदनले निर्देशन गरे बमोजिम क्रियाशील गराउने निर्णय समेत भएको छ । 

आगामी चैत्र ५ गते हुने स्ववियू निर्वाचनको लागि हाल निर्वाचन तोकिएका ७ वटा क्याम्पसमा निर्वाचन परिचालन समितिसँग समन्वय गर्नको लागि पार्टीको तर्फबाट फोकल पर्सन समेत तोकिएको जिल्ला संयोजक रोकाले बताउनुभयो । उहाँका अनुसार राडीज्यूला शिक्षा क्याम्पसमा खुमराज ओली, सानीभेरी शिक्षा क्याम्पसमा धर्मबहादुर पुन, शीतल क्याम्पस चौरजहारीमा खुमबहादुर खड्का, जहारी क्याम्पसमा खोलागाउँमा सुन्दर शर्मा, सिम्रुतु क्याम्पसमा मोहनकिशोर ओली, रुकुमेली क्याम्पसमा दलबहादुर खड्का र स्यार्पू बहुमुखी क्याम्पसमा चन्द्रबहादुर केसीलाई फोकल पर्सन तोकिएको छ ।      

बैठकमा जिल्ला संयोजक रोकाले सङ्गठन, आर्थिक, उत्पादन, भूकम्प पुनर्निर्माण सम्बन्धमा गर्नुपर्ने निर्णय सम्बन्धी प्रस्ताव र जनतासँग माओवादी अभियानको कार्य योजना प्रस्तुत गर्नुभएको थियो ।