रुकुम पश्चिममा महिलाहरूको नेतृत्व विकासमा चुनौती विषयक अन्तर्क्रिया सम्पन्न भएकाे छ । ११५ औँ अन्तर्राष्ट्रिय महिला श्रमिक दिवसको अवसरमा अन्तर पाटी महिला सञ्जाल रुकुम पश्चिमको आयोजनामा कार्यक्रम भएको हो ।

कार्यक्रमका सहभागीहरूले महिलाहरूको नेतृत्व विकासमा विभिन्न कारण कारक रहेको बताएका थिए । महिलाहरूलाई नेतृत्वमा पुग्न घरपरिवार, राजनीतिक दल, सामाजिक विभेद, आर्थिक समस्या लगायतले बाधा पुर्याइरहेकाे सहभागीहरूको भनाई थियो ।

महिलाहरूको नेतृत्व विकास र नेतृत्वमा पुर्‍याउन घरपरिवार, राजनीतिक दल देखि सरोकारवाला सबैको दायित्व रहेको सहभागीहरूले बताएका थिए । त्यस्तै महिलाहरूको नेतृत्व विकास र महिलाका सवालमा महिला जनप्रतिनिधि, महिला सांसद र राजनीतिक दलका प्रमुखहरूको सहभागितामा संवाद कार्यक्रम सञ्चालन गर्ने सहमति भएको अन्तर पाटी महिला सञ्जालका अध्यक्ष निर्मला विष्ट खड्काले जानकारी दिनुभयो ।

अध्यक्ष खड्काको अध्यक्षतामा भएको कार्यक्रममा पूर्व कर्णाली प्रदेश सभा सदस्य देवी ओलीको प्रमुख र मुसिकोट नगरपालिकाका पूर्व उपप्रमुख प्रेमकुमारी सुनारको विशेष आतिथ्यता रहेको थियो । कार्यक्रममा अधिवक्ता मनिषा भण्डारी, राजनीतिक दलका महिला संघ सङ्गठन, महिला अधिकारकर्मी तथा सरोकारवाला निकायका प्रमुख तथा प्रतिनिधिहरूकाे उपस्थिति रहेको थियो ।

अन्तर पाटी महिला सञ्जालको कार्यालय बागबजारमा भएको कार्यक्रमको सञ्चालन सञ्जालका सदस्य अञ्जना चन्दले गर्नुभएको थियो । कार्यक्रममा ३४ जनाकाे सहभागिता रहेकाे थियाे ।