रुकुम पश्चिममा कोरोना विरुद्धको खोप कोभिशिल्डको पहिलो डोज लगाएर दोस्रो डोज लगाउन छुटेकालाई जेठ १४ गते खोप लगाईने भएको छ । गत फागुन २३ गतेभन्दा अगाडि पहिलो डोज लगाएर दोस्रो डोज लगाउन छुटेकाहरुलाई दोस्रो डोज दिन लागिएको हो । स्वास्थ्य सेवा कार्यालयले एक सूचना जारी गरेर जिल्ला कोभिड–१९ खोप समन्वय समितिको निर्णय अनुसार फागुन २३ गते भन्दा अगाडि पहिलो प्राथमिकतामा परी पहिलो डोज लगाएर र दोस्रो डोज लगाउन छुटेकालाई खोप लगाउन लागिएको जनाएको छ । 

जसका लागि २ वटा खोप केन्द्रहरु तय गरिएको स्वास्थ्य सेवा कार्यालकी कोप सुपरभाइजर अधिकृत कृष्णा खड्काले जानकारी दिनुभयो । उहाँका अनुसार राप्ती समाज अस्पताल मुसीकोट नगरपालिका १ सल्ले र आधारभुत स्वास्थ्य सेवा केन्द्र चौरजहारीमा खोप लगाईने छ । पहिलो मात्रा लगाएर दोस्रो मात्रा लगाउन करिब ४ जना व्यक्तिहरु छुटेको स्वास्थ्य सेवा कार्यालयको भनाई छ । त्यस्तै फागुन २३ गते देखि खोपको पहिलो मात्रा पाएका ६५ वर्ष उमेर समुहका र अन्य व्यक्तिहरुको लागि दोस्रो मात्रा आईनसकेकाले खोप आएपछि जानकारी गराईने खोप सुपरभाइजर अधिकृत खड्काले बताउनुभयो । 

यसका साथै काठमाडौं उपत्यकामा कोरोना विरुद्धको खोप भेरोसेलको पहिलो मात्रा लगाएका र हाल विभिन्न कारणले जिल्ला आएकाहरुको विवरण पनि संकलन भइरहेको छ । उनिहरुलाई जिल्लामै खोप लगाउने स्वास्थ्य तथा जनसंख्या मन्त्रालयको निर्णय अनुसार जिल्लामा पनि विवरण संकलन भइरहेको स्वास्थ्य सेवा कार्यालयले जनाएको छ ।