जिल्ला विपद व्यवस्थापन समिति रुकुम पश्चिमले गर्मी मौसमा हुने विपद व्यवस्थापन गर्न विभिन्न निर्णयहरु गरेको छ । मंगलबार जिल्ला प्रशासन कार्यालयमा बसेको विपद व्यवस्थापनको बैठकले गर्मी मौसमा हुने क्षति न्यूनीकरण गर्न विभिनन निर्णय गरेको हो । गर्मी मौसममा हुने तापक्रम वृद्धि तथा हावाहुरीका कारण अत्यधिक मात्रामा लागलागी तथा डढेलोको कारण ठूलो धनजनको क्षति हुने भएकाले यसलाई न्यूनीकरण गर्न तथा घटना हुन नदिन  जिल्लास्थित सबै सुरक्षा निकायहरू, स्थानीय तह तथा रेडक्रस लगायतका सङ्घसंस्थाहरू बिच कार्यात्मक समन्वय गर्ने निर्णय भएको जिल्ला विपद व्यवस्थापन समितिले जनाएको छ । 

त्यस्तै बैठकले चौरजहारी नगरपालिका वडा नम्बर २ मा भूकम्पबाट पूर्ण वा आंशिक रूपमा क्षति भएका निजी आवासको प्राविधिकहरूबाट विस्तृत क्षति आँकलनको गरी स्थानीय विपद् व्यवस्थापन समितिको निर्णय सहितको सिफारिसका आधारमा १० लाभगा्रहीलाई जिल्ला प्रशासन कार्यालयको निर्णयबाट अनुमोदन गरी राष्ट्रिय विपद् जोखिम न्यूनीकरण तथा व्यवस्थापन प्राधिकरणमा सिफारिस गरिएको जिल्ला विपद व्यस्थापन संयोजक तथा प्रमुख जिल्ला अधिकारी कुलबहादुर जिसीले जानकारी दिनुभयो ।

उहाँका अनुसार बैठकले सड़क सुरक्षा र यातायात सहजता समेतलाई मध्येनजर गर्दै जोखिम न्यूनीकरणका लागि मध्यपहाडी लोकमार्ग, राप्ती लोकमार्ग र सल्लीबजार चौरजहारी सडक खण्डमा आवश्यक सडक सुरक्षा एवम् यातायात सहजीकरणको लागि सडक डिभिजन चौरजहारीलालाई अनुरोध गर्ने निर्णय  समेत गरेको प्रमुख जिल्ला अधिकारी जिसीले जानकारी दिनुभयो ।