कृषि विकास कार्यालय रुकुम पश्चिमले अनुदानमा गोलासहितको मौरी घार वितरण गरेको छ । ५० प्रतिशत अनुदानमा कार्यालयले किसानलाई  गोलासहितका मौरी घार वितरण गरेको हो । चालु आर्थिक वर्षको मौरी विकास प्रवद्र्धन कार्यक्रम अन्तरर्गत मुसिकोट नगरपालिकाका ५३ जना कृषकलाई गोलासहितको मौरी घार र १४ जना कृषकलाई खाली घार वितरण गरेको कृषि विकास कार्यालय रुकुम  पश्चिमका कृषि अधिकृत महेश चन्दले जानकारी दिनुभयो । 

उहाँका अनुसार प्रत्येक कृषकलाई एक एक वटाका दरले गोलासहितको मौरी घार, धुवाँदानी, घुम्टी, कुनगेट र पञ्जा वितरण गरिएको हो । गोलासहितको मौरीघार आठविसकोट नगरपालिका वडा नम्बर ११ डाडाँगाउँबाट र खाली घार सल्यानको कालिमाटी गाउँपालिकाबाट ल्याएर कृषकलाई वितरण गरिएको हो । गोलासहितको मौरीघारलाई १० हजार र खाली घारलाई ४ हजार रुपैयाँमा खरिद गरी ल्याएको कृषि अधिकृत चन्दले जानकारी दिनुभयो । 

गोलासहितको मौरी घार लिने कृषकले ६ हजार १ सय ७५ रुपैयाँ र खाली घार लिने कृषकले २ हजार रुपैयाँ बेहोरेका छन् । बाँकी ५० प्रतिशत भने कृषि विकास कार्यालयले सहयोग गरेको छ । नगरपालिकाको वडा नम्बर २, ४, ५, ६, ७, १०, १३ र १४ नम्बर वडाका कृषकलाई मौरी घार वितरण गरिएको हो । 

यस वर्ष कृषि विकास कार्यालयले मौरी विकास प्रवद्र्धन कार्यक्रमको लागि ४ लाख बजेट विनीयोजन गरेको थियो । गत वर्षपनि ५० प्रतिशत अनुदानमा कृषि विकास कार्यालयले ७० जना कृषकलाई गोलासहितको मौरी घार र ३६ जनालाई खाली घार वितरण गरेको थियो । यस वर्ष मुसिकोट नगरपालिका वडा नम्बर १० का ९ जना कृषकले गोलासहितको मौरी घार र ३ जना कृषकले खाली घार ५० प्रतिशत अनुदानमा पाएको वडा अध्यक्ष धनबहादुर खड्का ‘बसन्त’ले जानकारी दिनुभयो ।