रुकुम पश्चिमको मुसिकोट नगरपालिका वडा नम्बर ५ सेरिगाउँमा बुधवार भएको आगलागीबाट २१ लाख बढीको क्षति भएको छ । प्रहरी मुचुल्का अनुसार आगलागीबाट २१ लाख २४ हजार ९ सय ९९ रुपैयाँको क्षति भएको हो ।

विद्युतकाे तार सर्ट हुँदा स्थानीय कृष्ण बुढाको २ तले कच्ची घरमा आगलागी भएको थियो । उक्त आगलागीबाट घर पूर्ण रूपमा ध्वस्त भएको छ भने घरमा रहेका सबै सामान जलेर नष्ट भएका छन् ।

आगलागीबाट २५ हजारको जस्तापाता, २ लाखको झ्याल ढोकाको काठ र घर बनाएको खर्च ४५ हजार गरी २ लाख ७० हजार खर्च भएको प्रहरी मुचुल्कामा उल्लेख छ ।

बाँकी क्षति कोठा भाडामा बस्ने राजन विकको हो । एक लाख ५० हजारको लत्ता कपडा, ७ लाख ८९ हजार ९ सय ९९ रूपैयाँ बराबरका भिडिओ एक्सरे मेसिन, प्रिन्टर, टिभी, ल्यापटप, मोबाइल, ५ लाख ३५ हजार नगद र ३ लाख ८० हजार बराबरको सुनको औँठी तथा सुनको सिक्री क्षति भएको मुचुल्का तयार भएको जिल्ला प्रहरी कार्यालयका सूचना अधिकारी प्रहरी निरीक्षक ऋषि पाठकले जानकारी दिनुभयो ।