नेपाली सेनाको चण्डी दल गण रुकुम पश्चिमले जिल्लाको गोतामकोटमा निःशुल्क प्राथमिक स्वास्थ्य परीक्षण शिविर सम्पन्न गरेको छ । 

शनिवार आठबिसकोट नगरपालिका-४ को गोतामकोट स्वास्थ्य चौकीमा भएको शिविरबाट ६७३ जनाको स्वास्थ्य परीक्षण गरिनुका साथै निःशुल्क औषधि वितरण गरिएको छ ।

चण्डी दल गणले नं. १९ बाहिनी अड्डाको नेतृत्व तथा नं. १९ फिल्ड एम्बुलेन्स गुल्मको समन्वयमा शिविर सम्पन्न गरेको हो । चण्डी दल गण रुकुम पश्चिमका अनुसार शिविरबाट ५१८ जना महिला र १५५ जना पुरुषले सेवा लिएका हुन् । जसमध्ये ६२ जना बालबालिका रहेका थिए ।

शिविरबाट स्त्री रोग जाँच तथा उपचार, मनोसामाजिक परामर्श सेवा, स्वास्थ्य परीक्षण तथा औषधि वितरण सेवा प्रदान गरिएको थियो । शिविरबाट १८६ जनाले स्त्री रोग सम्बन्धी र एक सय जनाले मनोसामाजिक परामर्श सेवा लिएको गणले जनाएको छ ।  

गाउँमै शिविर मार्फत निःशुल्क सेवा पाउँदा सर्वसाधारणहरू खुसी भएका छन् । आठबिसकोट नगरपालिकाका उपप्रमुख धनकुमारी शाहीले नेपाली सेनाले दुर्गम बस्तीमा स्वास्थ्य शिविर सञ्चालन गरेर ग्रामीण क्षेत्रका सर्वसाधारणको स्वास्थ्यमा टेवा पुर्याएकाे बताउनुभयो । उहाँले चिकित्सक सहितको टोलीबाट भएको निःशुल्क स्वास्थ्य जाँच र औषधि वितरण समेतको व्यवस्थाबाट गाउँवासीमा ठुलो राहत भएको उल्लेख गर्नुभयो । 

 नं. १९ बाहिनी अड्डाका बाहिनी पति सहायक रथी श्री पदमबहादुर बुढा (पिएच.डी.) नेतृत्वको टोलीले शिविर सञ्चालन गरेको हो । बाहिनी पति सहायक रथी बुढाको प्रमुख आतिथ्यतामा भएकाे उक्त शिविरमा चण्डी दल गणका गणपति शरद थापा, नं. १९ फिल्ड एम्बुलेन्स गुल्मका चिकित्सकहरूको उपस्थिति रहेको थियो । 

शिविर आठबिसकोट नगरपालिका कार्यालय, वडा नम्वर ४ को कार्यालय, स्वास्थ्य सेवा कार्यालय, ओरेक नेपाल, गोतामकोट स्वास्थ्य चौकी लगायतको सहकार्यमा सम्पन्न गरिएको हो ।