अखिल नेपाल ट्रेड युनियन महासंघ चौरजहारी रुकुम पश्चिमले मजदुरहरुका विभिन्न माग राख्दै  नगरपालिकालाई माग पत्र पेस गरेको छ । आज ट्रेड युनियन महासंघ चौजहारी नगर  समिति अध्यक्ष प्रेम महरले विभिन्न माग राख्दै नगर प्रमुख पुष्प वादीलाई माग पत्र पेस गर्नुभएको हो । ट्रेड युनियन महासंघ आठौं महाधिवेसनले पारित गरेको पन्चवर्षीय योजना अनुसार संघ, प्रदेश र स्थानिय तहमा कार्यरत सम्पुर्ण मजदुरहरुको हक अधिकार र सामाजिक सुरक्षा ग्यारेन्टी गर्न तिनै तहका सरकारलाई दबाब सृजना गर्ने उद्देश्यका साथ विभिन्न मागसहित माग पत्र पेस गरिएको महासंघका नगर समिति अध्यक्ष महरले जानकारी दिनुभयो । 

युवा शक्तिको अत्याधिक विदेश पलायन रोक्न तथा नगर भित्रै श्रम गरिरहेका मजदुरहरुको सामाजिक सुरक्षाको ग्यारेटी गर्न ९ बुँदे माग पत्र पेस गरिएको छ  । चौरजहारी नगरपलिकामा तत्काल श्रम सम्बाद समिति गठन गरी मजदुरका समस्या समाधनको पहल गर्नुपर्ने, कुनै पनि श्रमिकलाई काममा लगाउनु अघि श्रम ऐन २०७४ को दफा ११ अनुसार अनिवार्य श्रम संझौता गरेर मात्र काममा लगाउने व्यावस्था मिलाउनुपर्ने, कुनै पनि श्रमिकलाई नेपाल सरकारले तोकेको न्युनतम पारिश्रमिक  १० हजार ८ सय २० र  महङगी भत्ता ६ हजार ४ सय ८० गरी जम्मा रु १७ हजार ३ सय रुपैयाँ मासिक तलब उपलब्ध  गराउनुपर्ने माग राखिएको छ ।

त्यस्तै कुनै पनि मजदुरहरुलाई ८ घण्टा भन्दा बढि काम गराउनु पर्ने अवस्था आएमा ओटिको ब्यवस्था गर्नुपर्ने, नगरपलिका भित्र रहेका औपचारिक क्षेत्र, औपचारिक क्षेत्र र स्वरोजगार क्षेत्रमा काम गर्ने सम्पुर्ण मजदुरहरुलाई योदानमा आधारित सामाजिक सुरक्षा कोषमा सुचिकृत गर्नका लागी आवस्यक बजेटको व्यवस्था गर्नुपर्ने, चौरजहारी नगरपलिका भित्रका बेरोजगार युवा युवतीहरुका लागी बिभिन्न सिपमुलक तालिमको व्यवस्था गर्नुपर्ने, नगर क्षेत्रमा भौतिक पुर्वाधार कार्यालय र सडक डिभिजन कार्यालयबाट राखिएका सडक मजदुर (पीटउली) हरुलाई १३ दिन मात्र भएर ३० दिन काम गराउनुका साथै मासिक रु १७ हजार तीन सय रुपैयाँ दिलाउन यथासिघ्र पहल गर्नुपर्ने,  श्रम ऐन २०७४ र सामाजिक सुरक्षा ऐन कार्यान्यन नगर्ने उद्योग तथा प्रतिस्ठानहरुलाई कारबाहिको दायरा ल्याउनुपर्ने माग राखिएको छ । 

अखिल नेपाल ट्रेड युनियन महासंघमा विभिन्न पेशामा आवद्ध रहेका शारिरीक तथा मानसिक दुवै किसिमका श्रम गर्ने मजदुरहरु संगठित  भएकाले उनिहरुको समस्या र चुनौतिलाई अवसरमा बदल्न तिनै तहका सरकारको महत्वपुर्ण भुमिका खेल्नुपर्ने महासंघको भनाई छ ।