रुकुम पश्चिमको मुसिकोट नगरपालिका वडा नम्बर १ खलङ्गामा सञ्चालित २ दिने औद्योगिक प्रदर्शनी सम्पन्न भएको छ । उद्योग तथा उपभोक्ता हित संरक्षण कार्यालय रुकुम पश्चिमको आयोजनामा मङ्गलवार र बुधवार गरी २ दिने प्रदर्शनी चलेको हो ।

प्रदर्शनीमा सहभागी १९ उद्यमी मध्ये उत्कृष्ट उद्यमीहरूलाई पुरस्कृत गरिएको छ । उद्याेग तथा उपभोक्ता हित संरक्षण कार्यालय प्रमुख रमेश ओलीका अनुसार ३ जना उत्कृष्ट उद्यमीलाई पुरस्कृत गरिएको हो ।

प्रदर्शनीमा मुसिकोट नगरपालिका वडा नम्बर ८ का गङ्गाकुमारी थापा र मनकुमारी रोकाले सञ्चालन गरेको घाेरखानी अल्लो तथा ढाका उद्योग प्रथम भएको ओलीले जानकारी दिनुभयो ।

त्यस्तै आठबिसकाेट नगरपालिका वडा नम्बर २ का दीपक ओलीले सञ्चालन गरेको सिस्ने हिमाल नेपाली हाते कागज उद्योग द्वितीय र त्रिवेणी ६ का कर्णराज ओलीले सञ्चालन गरेको मनाेशान्ती मल्टी पर्पाेज एग्रिकल्चर किवी प्रालि तृतीय भएको छ ।

प्रथमलाई २० हजार, द्वितीयलाई १० हजार र तृतीयलाई ७ हजार नगद पुरस्कार प्रदान गरिएको कार्यालय प्रमुख ओलीले जानकारी दिनुभयो । उद्योगीलाई प्रोत्साहनका लागि वार्षिक कार्यक्रम अनुसार प्रदर्शनी आयोजना गरिएको उहाँको भनाई छ ।

एक कार्यक्रमका बिच प्रदर्शनीको समापन गरिएको हो । समापन कार्यक्रममा बोल्दै जिल्ला समन्वय समिति प्रमुख लुम्बिनी गौतमले उद्योगीहरूका लागि यो कार्यक्रम महत्त्वपूर्ण रहेको बताउनुभयो । सबै पालिकामा यस्ता कार्यक्रमहरू नियमित रूपमा हुनुपर्ने बताउनुभयो ।

यो पटकको प्रदर्शनीमा उद्यमीहरूको उपस्थिति कमजोर रहेकाे भन्दै उहाँले सहभागिता बढाउनु पर्नेमा उहाँले जोड दिनुभयो । सबैतिर समन्वय गर्दा गर्दै पनि उद्यमीको उपस्थिति धेरै बन्न नसकेको भन्दै अबका कार्यक्रममा यसतर्फ गम्भीर हुने कार्यालय प्रमुख ओलीको भनाई थियो ।

ओलीको अध्यक्षतामा भएको कार्यक्रममा समन्वय प्रमुख गौतमको प्रमुख र समन्वय उपप्रमुख देवबहादुर बिक र प्रमुख जिल्ला अधिकारी कुलबहादुर जिसीको विशेष आतिथ्यता रहेको थियो ।

त्यस्तै कार्यक्रममा प्रमुख अनुसन्धान अधिकृत चिरञ्जीवी बुढा, प्रहरी निरीक्षक ऋषि पाठक, जिल्ला समन्वय अधिकारी जितबहादुर ओली, तरकारी बीउ बिजन केन्द्र चापाका प्रमुख पदमबहादुर सुवेदी लगायतकाे आतिथ्यता रहेको थियो ।

कार्यक्रमको सञ्चालन घरेलु तथा उद्योग तथा उपभोक्ता हित संरक्षण कार्यालयका प्रशासकीय अधिकृत मानबहादुर खत्रीले गर्नुभएको थियो ।