जाजरकोट केन्द्रबिन्दु भएर भूकम्प गएको छ । शुक्रवार राती ८ बजेर ७ मिनेटमा ५.२ म्याग्नेच्युडको भूकम्प भएको नेपाल भूकम्प मापन केन्द्रले जानकारी गराएको छ । उक्त भूकम्पको धक्का जाजरकोट, रुकुम पश्चिम सहित कर्णाली र लुम्बिनी प्रदेशका विभिन्न जिल्लामा महशुस भएको थियो ।

भूकम्पको धक्का महसुस भएपछि मानिसहरू घर बाहिर निस्किएका थिए । अहिले पनि केही मानिस घर बाहिरै रहेका छन् । भूकम्पको क्षतिको विवरण भने आइसकेको छैन । तर केही घर चर्किएका विवरणहरू प्राप्त भइरहेका छन् । रुकुम पश्चिमको आठबिसकोट नगरपालिका वडा नम्बर ९ का प्रकाश गौतमले भूकम्पले घर चर्किएको तस्बिर सामाजिक सञ्जाल फेसबुकमा शेयर गर्नुभएको छ ।

अन्य ठाउँहरूमा पनि घरहरू चर्किएको विवरण प्राप्त भइरहेका छन् । प्रमुख जिल्ला अधिकारी कुलबहादुर जिसीले अहिलेसम्म क्षतिको विवरण प्राप्त नभएको बताउनुभयो । सबै पालिकाहरूमा बुझेको र प्रहरीलाई समेत विवरण संकलनका लागि भनिएको जानकारी गराउँदै अहिलेसम्म कतै पनि क्षतिको जानकारी प्राप्त नभएको उहाँले बताउनुभयो ।

त्यस्तै स्थानीय तहहरूले समेत क्षतिको विवरण बारे जानकारी गराउन र सतर्क रहन आग्रह गरेका छन् । चौरजहारी नगर प्रमुख पुष्प वादीले भूकम्पको जोखिम कायम रहेकोले सतर्क रहन र क्षतिको विवरण नगरपालिकाको कल सेन्टर, जनप्रतिनिधि वा कर्मचारीलाई टिपाउन आग्रह गर्नुभएको छ ।