शुक्रवार राती ८ बजेर ७ मिनेटमा जाजरकोट केन्द्र भएर ५.२ म्याग्नेच्युडको भूकम्प गएको छ । उक्त भूकम्पको धक्का जाजरकोट, रुकुम पश्चिम सहित कर्णाली र लुम्बिनी प्रदेशका विभिन्न जिल्लामा महसुस भएको थियो । भूकम्पका कारण कुनै क्षति भए नभएको बारेमा जानकारी हुन सकेको छैन ।

रुकुम पश्चिमका प्रमुख जिल्ला अधिकारी कुलबहादुर जिसीले अहिलेसम्म क्षतिको विवरण प्राप्त नभएको बताउनुभयो । सबै पालिकाहरूमा बुझेको र प्रहरीलाई समेत विवरण संकलनका लागि भनिएको जानकारी गराउँदै अहिलेसम्म कतै पनि क्षति भएको जानकारी प्राप्त नभएको उहाँले बताउनुभयो ।

'भूकम्पको धक्का धेरै समय देखिएन, जिल्लाका सबै ठाउँमा बुझ्दा अहिलेसम्म क्षति भएको बारे कुनै जानकारी प्राप्त भइसकेको छैन,' उहाँले भन्नुभयो ।

त्यस्तै स्थानीय तहहरूले समेत क्षतिको विवरण बारे जानकारी गराउन र सतर्क रहन आग्रह गरेका छन् । चौरजहारी नगर प्रमुख पुष्प वादीले भूकम्पको जोखिम कायम रहेकोले सतर्क रहन र क्षतिको विवरण नगरपालिकाको कल सेन्टर, जनप्रतिनिधि वा कर्मचारीलाई टिपाउन आग्रह गर्नुभएको छ ।