राप्ती साहित्य परिषद् रुकुम पश्चिमको भवन शिलान्यास भएको छ । मुसिकोट नगरपालिका वडा नम्बर ५ को शेरिगाउँमा कर्णाली प्रदेशका पूर्व मुख्यमन्त्री राजकुमार शर्माले शिलान्यास गर्नुभएको हो ।

भवनको शिलान्यास गर्दै पूर्व मुख्यमन्त्री शर्माले राप्ती साहित्य परिषद्को योगदानको चर्चा गर्नुभयो । परिषद्ले जिल्लाको साहित्य विकासका लागि महत्त्वपूर्ण योगदान गरिरहेको भन्दै उहाँले अब आफ्नै भवन बनेपछि साहित्यिक गतिविधि सञ्चालनमा थप सहजता हुने विश्वास व्यक्त गर्नुभयो ।

राप्ती साहित्य परिषद्का जिल्ला अध्यक्ष मनलाल ओलीले भवन निर्माणका लागि जग्गा प्रदान गरेर समाजसेवाको उत्कृष्ट नमुना प्रस्तुत गरेको भन्दै उहाँले प्रशंसा गर्नुभयो । ओलीले स्वर्गीय पत्नी राधा ओलीको नाममा जग्गा उपलब्ध गराउनुभएको हो । उक्त जग्गामा भवन बन्न लागेको हो ।

भवनको पहिलो तला निर्माणको लागि कर्णाली प्रदेश सरकारबाट चालू वर्षका लागि १५ लाखको बजेट विनियोजन भएको छ । उपभोक्ता समिति मार्फत भवन निर्माण हुने छ । उपभोक्ता समितिले बताइएको छ । भवनको नाम राधा ओली स्मृति भवन रहने छ ।