नेकपा माओवादी केन्द्र रुकुम पश्चिमले पार्टीका सानीभेरी गाउँपालिका कमिटि अध्यक्ष टेकबहादुर पुन ‘छाँया’को निधनप्रति दुःख व्यक्त गरेको छ । पार्टी अध्यक्ष गोपाल शर्माले आज एक वक्तव्य जारी गर्दै ‘छाँया’को निधनप्रति दुःख व्यक्त गर्नुका साथै यसले पार्टीलाई स्तव्ध बनाएको बताउनुभएको छ । 

पार्टीले दिवंगतप्रति भावपूर्ण श्रदाञ्जली एवं शोकाकुल परिवारजनमा गहिरो समवेदना व्यक्त गरेको छ । ‘छाँया’को निधनले रुकुमेली कम्युनिष्ट आन्दोलनलाई अपूरणीय क्षति पुगेको नेकपा माओवादी केन्द्रले जनाएको छ । ‘२०२५ जेठ २१ गते पुर्तिमकाँडा गाविसको गिठाकोटमा जन्मनुभएका क.छाँया २०४५ देखि नै कम्युनिष्ट राजनीतिमा सक्रिय हुनुभएको थियो । २०५२ जेठ ३ गते कम्युनिष्ट पार्टीको सदस्यता प्राप्त गर्नुभएका क.छाँयाको निधनका कारण पार्टीले एकजना निष्ठावान, आदर्शवान, कुशल संगठक एवं जनप्रिय नेतालाई गुमाउनुपरेको छ । यसले समग्र रुकुमेली कम्युनिष्ट आन्दोलनलाई अपूरणीय क्षति पुगेको छ, पार्टीले जारी गरेको वक्तव्यमा उल्लेख गरिएको छ ।’  

जनयुद्ध सुवात अघि नै योङ्ग कम्युनिष्ट लिग (वाईसीएल)को एरिया सचिवको रुपमा पूर्णकालीन हुनुभएका उहाँले जनयुद्धमा लडाकु दल सदस्य हुँदै पार्टीको विभिन्न जिम्मेवारीमा रही काम गरेको पार्टीले जनाएको छ । नेता छाँयाले पार्टीमा, जनयुद्ध, माओवादी आन्दोलन र समग्र कम्युनिष्ट आन्दोलनमा गरेको योगदानको स्मरण गर्दै नेकपा माओवादी केन्द्र रुकुम पश्चिमले उहाँप्रति उच्च सम्मान पनि व्यक्त गरेको छ ।