रुकुम पश्चिम र पूर्वका अधिकांश स्थानीय तहहरुले आज नीति, कार्यक्रम र बजेट ल्याउँदैछन् । केहि स्थानीय तहहरुले यसअघि नै नीति, कार्यक्रम र बजेट ल्याईसकेका छन् । तर अधिकांशले आज ल्याउन लागेका छन् । रुकुम पश्चिमको मुसीकोट नगरपालिकाले आज नीति, कार्यक्रम र बजेट ल्याउँदै छ । नगरपालिकाले आज नीति, कार्यक्रम र बजेट दुवै एक पटक नगर सभामा पेश गर्ने तयारी गरेको छ । नगर प्रमुख देविलाल गौतमले नीति कार्यक्रम र उप–प्रमुख प्रेमकुमारी सुनारले बजेट पेश गर्ने कार्यक्रम रहेको नगरपालिकाले जनाएको छ ।
बुधबार नीति, कार्यक्रम ल्याएको चौरजहारी नगरपालिकाले आज बजेट ल्याउँदै छ । बुधबार नगर प्रमुख विशाल शर्माले नगर सभामा नीति, कार्यक्रम पेश गरेकामा आज उप–प्रमुख राधा रोकाले बजेट पेश गर्ने नगरपालिकाको भनाई छ । आठबीसकोट नगरपालिकाले आज नीति, कार्यक्रम ल्याउने तयारी गरेको छ । बजेट भने आज पेश नहुने नगरपालिकाले जनाएको छ । बाँफिकोट गाउँपालिकाले पनि आजै नीति, कार्यक्रम र बजेट ल्याउँदै छ ।
आजबाट सुरु हुने गाउँसभामा अध्यक्ष धर्मवहादुर केसीले नीति, कार्यक्रम र उपाध्यक्ष मनकला पुनले बजेट पेश गर्ने गाउँपालिकाका निमित्त प्रमुख प्रशासकीय अधिकृत ज्ञानबहादुर खड्काले जानकारी दिनुभयो । सानीभेरी गाउँपालिकाले भने मंगलबार नै नीति, कार्यक्रम र बजेट गाउँसभामा पेश गरिसकेको छ । उता त्रिवेणि गाउँपालिकाले भने आज नीति, कार्यक्रम र बजेट नल्याउने भएको छ । छलफल चलिरहेको र केहि दिनमा नीति, कार्यक्रम र बजेट आउँने गाउँपालिकाले जनाएको छ ।
रुकुम पूर्वमा के हुन्छ ?
रुकुम पूर्वको सिस्ने गाउँपालिकाले आज नीति कार्यक्रम र बजेट ल्याउँदै छ । आजबाट सुरु हुने गाउँसभामा गाउँपालिका अध्यक्ष कुमारी बरालले नीति, कार्यक्रम र उपाध्यक्ष गोबरधन बुढाले बजेट पेश गर्ने गाउँ कार्यपालिका प्रवक्ता जीवन केसीले जानकारी दिनुभयो । भुमे गाउँपालिकाले भने आज बजेट पेश गर्दै छ ।
नीति कार्यक्रम बुधबार नै गाउँसभामा पेश भएकामा आज उपाध्यक्ष मनकुमारी बुढा बिष्टले बजेट पेश गर्दै हुनुहुन्छ । अध्यक्ष रामसुर बुढाले बुधबार नीति, कार्यक्रम पेश गर्नुभएको थियो । जिल्लाको पुथाउत्तरगंगा गाउँपालिकाले भने बुधबार नै नीति, कार्यक्रम र बजेट ल्याईसकेको छ ।
