रुकुम पश्चिमको मुसीकोट नगरपालिका वडा नं. १० बाट डेढ सय क्विन्टल लसुन निर्यात भएको छ । वडाका विभिन्न टोलबाट १ सय ५३ क्विन्टल लसुन जिल्ला बाहिर निर्यात भएको हो । दुई चरणमा गरेर लसुन निर्यात भएको किसानहरुले बताएका छन् । लसुनबाट यो वर्ष वडामा साढे १५ लाख बढी रुपैंया भित्रिएको छ । किसानले लसुनमा दुई वटा मुल्य पाएका छन् । पहिलो चरणमा १ सय रुपैंया प्रति किलोमा बिक्रि भएको लसुन दोस्रो चरणमा भने प्रति किलो १ सय ६ रुपैंयामा बिक्रि भएको छ । व्यापारीहरुले गाउँमै पुगेर लसुन खदिर गरि लगेका हुन् ।
१ सय ८ क्विन्टल लसुनले प्रतिकिलो १ सय रुपैंया मुल्य पाउँदा दोस्रो चरणमा बिक्रि भएको ४५ क्विन्टल लसुनले प्रतिकिलो १ सय ६ रुपैंया मुल्य पाएको वडा सदस्य धनवहादुर खड्का ‘बसन्त’ले जानकारी दिनुभयो । लसुनबाट वडामा १५ लाख ५७ हजार रुपैंया भित्रिएको उहाँको भनाई छ । एउटै किसानले कममा ५० किलो देखि बढिमा १३ क्लिन्टलसम्म लसुन बिक्रि गरेका छन् । वडा कार्यालयका अनुसार गत वर्षको तुलनामा यो वर्ष लसुन उत्पादन बढेको छ । गत वर्षको तुलनामा ४० क्विन्टल बढी उत्पादन भएको वडा सदस्य खड्काले बताउनुभयो ।
यसका अलावा किसानहरुले गतवर्षको तुलनामा यो वर्ष वीउ पनि बढी राखेको उहाँको भनाई छ । वडाका खड्का टोल, गलम्पाटी, चौर लगायतका टोलमा लसुन उत्पादन हुने गरेको छ । पछिल्ला वर्षहरुमा वडामा लसुन उत्पादक किसानहरुको संख्या बढिरहेको छ । पहिले केहि टोलका किसानले मात्र लसुन खेती गर्ने गरेकामा हाल भने वडाका सबैतिर लसुन खेति गर्न थालिएको वडाध्यक्ष गोप्यश्वर केसीले बताउनुभयो । वडाले लसुनको वीउ वितरण देखि लसुनको बजारीकरणमा सहयोग गरेपछि वडावासीहरु लसुन उत्पादनमा आकर्षित भएको उहाँले बताउनुभयो ।
उहाँका अनुसार सुरुमा ५० रुपैंया पनि मुल्य पाउन मुश्किल भइरहेको अवस्थामा हाल भने घरबाटै १ सय ६ रुपैंयासम्म मुल्य परेको केसीले बताउनुभयो । यसमा वडाले व्यापारीहरुलाई गाउँसम्म ल्याउने र मुल्यका लागि सहजिकरणको भुमिका खेल्ने गरेको उहाँको भनाई छ । पहिले वडावासीले डोकोमा बोकेर बजारसम्म ल्याएर लसुन बिक्रि गर्ने गरेका थिए । वडाले आर्थिक वर्ष २०७४/०७५ देखि वडावासीले उत्पादन गर्ने लसुनको बजारीकरणका लागि पहल गर्न सुरु गरेको थियो । त्यसपछि आर्थिक वर्ष २०७५/०७६ मा २५ क्विन्टल लसनुको वीउ वडावासीलाई बितरण गरिएको थियो ।
त्यसैबाट उत्पादन गरेर वडावासीले अहिलेसम्म वीउको व्यवस्था गर्ने गरेको वडा कार्यालयले जनाएको छ ।
