बाँफिकोट गाउँपालिकाले खेलकुद सामग्री वितरण गरेको छ । १० वटै वडाका खेलाडीलाई खेलकुद सामग्री वितरण गरिएको हो । चालु आर्थिक बर्षमा विनियोजित बजेटबाट खरिद गरिएका खेलकुद सामग्री गाउँपालिका कार्यालयबाट वितरण गरिएको हो । १० वडामा ३ वटाका दरले ३० वटा भलिबल, २ वटाका दरले २० वटा भलिबलका जाली, २ वटाका दरले भलिबल भर्न प्रयोग हुने २० वटा पम्प वितरण गरिएको छ । यसैगरी १ वटाका दरले १० वटा ब्याडमिन्टन का जाली र ४ नम्बर वडामा थप २ वटा फुटबल प्रदान गरिएको छ ।

गाउँपालिका स्तरीय खेलकुद विकास समितिको आयोजनामा खेलकुद सामग्री हस्तान्तरण कार्यक्रम भएको थियो । गाउँपालिका उपाध्यक्ष मनकला पुन, प्रमुख प्रशासकीय अधिकृत महेशकुमार गुरुङ, ३ नम्बर वडाध्यक्ष चन्द्रबहादुर केसी, ४ नम्बर वडाध्यक्ष लिलाराम विक, कार्यपालिका सदस्य शेरु विक र इलाका प्रहरी कार्यालय बाँफिकोटका इन्चार्ज प्रहरी नायव निरीक्षक तिलकबहादुर शाहीले खेलाडीलाई सामग्री हस्तान्तरण गर्नुभएको थियो । कार्यक्रममा वडा खेलकुद विकास समितिका पदाधिकारी लगायत सभागि थिए ।