युरोकप २०२० को पहिलो सेमिफाइनलमा आज राति इटली र स्पेनबीच प्रतिस्पर्धा हुँदैछ । लण्डनस्थित वेम्वली मैदानमा हुने खेल नेपाली समय अनुसार राति १२ः४५ बजे सुरु हुनेछ । यी दुई टोली युरोकपको नकआउट राउण्डमा भिड्न लागेको यो लगातार चौथो पटक हो । सन् २००८ र २०१२ मा स्पेनले इटलीलाई पराजित गरेको थियो भने २०१६ मा इटलीले बदला लिएको थियो । यस संस्करणमा इटली र स्पेन अपराजित छन् । अझ इटलीले खेलेका सबै ५ खेल जितेको छ ।

समूह चरणमा टर्की र स्वीट्जरल्याण्डलाई समान ३-० ले हराएको इटलीले वेल्सलाई १-० ले पराजित गरेको थियो । अन्तिम १६ मा अष्ट्रियालाई अतिरिक्त समयमा २-१ ले हराएको इटलीले क्वाटरफाइनलमा विश्व नम्बर एक बेल्जियमलाई २-१ ले नै पराजित गरेको थियो । उता स्पेनले राम्रो सुरुआत गर्न नसके पनि पछिल्ला खेलहरुमा गोलको वर्षा गर्दै आएको छ । समूहको पहिलो खेलमा स्वीडेनसँग गोल रहित बराबरीमा रोकिएको स्पेनले त्यसपछि पोल्याण्डसँग १-१ को बराबरी खेलेको थियो ।

समूहको अन्तिम खेलमा स्लोभाकियालाई ५-० ले पराजित गरेको स्पेनले अन्तिम १६ को ८ गोल थ्रिलर खेलमा क्रोएसियालाई अतिरिक्त समयमा ५-३ ले पराजित गरेको थियो । क्वाटरफाइनलमा स्पेनले स्विट्जरल्याण्डलाई पेनाल्टी सुटआउटमा पराजित गर्दै सेमिफाइनलमा स्थान बनाएको हो । यस पटक इटलीले गज्जबको प्रदर्शन गरिरहेको छ । इटली अन्तर्राष्ट्रिय फुटबलमा लगातार ३२ खेलमा अपराजत छ ।

यस्तै पछिल्लो १३ खेलमा इटली अपराजित छ । अष्ट्रिया र बेल्जियमविरुद्ध गोल बेहोरेको इटलीले त्यसअघि लगातार ११ खेलमा गोल खाएको थिएन । इटलीका डिफेण्डर स्पिनाजोला बेल्जियमविरुद्ध घाइते भएकाले उनले सेमिफाइनल खेल गुमाउनेछन् । उनको स्थानमा एमरसनले खेल्ने सम्भावना छ । यस्तै स्पेनका पाब्लो साराबिया पनि इटलीविरुद्ध खेल्नेमा शंका छ । स्विट्जरल्याण्ड विरुद्धको खेलमा मसलमा समस्या भएपछि उनलाई डानी ओल्मोले प्रतिस्थापन गरेका थिए ।

जर्मनीसँगै सर्वाधिक ३ पटक युरोकप जितेको स्पेनले यसपटक उपाधि जित्दै सबैभन्दा सफल टिम बन्न चाहन्छ । इटलीले भने सन् १९६८ मा एक पटक मात्र उपाधि जितेको छ । पछिल्लो पटक सन् २०१२ मा फाइनल खेलेको इटली स्पेनसँग नै पराजित भएको थियो । स्पेनले २००८ र २०१२ मा लगातार उपाधि जितेको थियो । त्यसअघि स्पेनले सन् १९६४ मा पहिलो पटक उपाधि जितेको थियो । अहिलेसम्म चार पटक सेमिफाइनल पुग्दा स्पेनले चारै पटक जित हात पारेको छ ।

जसमा तीन पटक उपाधि नै जित्दा सन् १९८४ मा भने उपविजेता बनेको थियो । उता इटली पनि अहिलेसम्म चार पटक सेमिफाइनल खेल्दा ३ पटक विजयी भएको थियो भने एक पटक पराजित भएको थियो । सन् २०१६ मा फ्रान्समा भएको युरोमा इटलीले स्पेनलाई क्वाटरफाइनलमा पराजित गरेको थियो । स्पेन त्यसको बदला लिने लक्ष्यमा पनि हुनेछ । पहिलो पटक युरोपको ११ देशमा आयोजना भएको युरोकपको अब बाँकी तीन खेल वेम्वली मैदानमा हुनेछ । जहाँ करीब ६० हजार दर्शकलाई प्रवेश अनुमति दिइने भएको छ ।

तर इटली र स्पेनका समर्थकको लागि भने धेरै टिकट दिइएको छैन । इटालियन फुटबल संघका अध्यक्ष गाब्रिएल ग्राभिनाले ६० हजारमध्ये १२५ टिकट मात्र दिएको बताए । इटलीका प्रशिक्षक रोबर्टो मान्सिनीले इटली र स्पेनका समर्थक त्यहाँ नहुनु राम्रो नभएको बताए । तर उनले थोरै मानिसको अगाडि खेल्नुभन्दा धेरैको अगाडि खेल्नु राम्रो हुने बताए । स्पेनका प्रशिक्षक लुइस एनरिकेले यो असामन्य अवस्था भएको भन्दै त्यहाँ इंग्लिसभन्दा स्पानिस र इटालियन समर्थक धेरै होस् भन्ने अपेक्षा राखेका छन् ।

इटली र स्पेन युरोकपमा खेल्न लागेको यो सातौं पटक हो । यूईएफएका अनुसार समग्रमा अहिलेसम्म यी दुई टिम ३७ पटक आमने सामने हुँदा दुवै टिमले ११-११ खेल जितेका छन् । १५ खेल बराबरीमा सकिएको थियो ।