रुकुम पश्चिमको मुसीकोट नगरपालिकाले ४ जना पत्रकारलाई पुरस्कृत गरेको छ । नवौं नगर सभाको सन्दर्भ पारी नगरपालिकाले विहीबार जिल्लामा क्रियाशिल ४ जना पत्रकारलाई पुरस्कृत गरेको हो । कान्तिपुर दैनिकका संवाददाता हरि गौतम, उज्यालो अनलाइनका संवाददाता राजु लामिछाने, नेपाल टेलिभिजनका संवाददाता अमरराज पुन र रेडियो सानीभेरीका समाचार सम्पादक परिचन्द्र खत्रीलाई नगद, प्रमाण पत्र र दोसल्लाले सम्मान गरिएको हो ।

नगरप्रमुख देविलाल गौतम, उपप्रमुख प्रेमकुमारी सुनार, प्रमुख प्रशासकीय अधिकृत नरहरि तिवारीले पत्रकारलाई सम्मान गर्नुभएको थियो । नगरपालिकाको विकासमा पत्रकारिताको माध्यमबाट योगदान गरेको भन्दै नगरपालिकाले पत्रकारलाई पुरस्कृत गरेको जनाएको छ । नवौं नगर सभा समापनपछि पत्रकार तथा अन्य विभिन्न संघ संस्था र व्यक्तिहरुलाई सम्मान गरिएको छ ।