आत्महत्या दुरुत्साहनको आरोपमा पक्राउ परेका रुकुम पश्चिमको सानीभेरी गाउँपालिका वडा नम्बर १० का दिपक खड्का साधारण तारेखमा रिहा भएका छन् । श्रीमती खिमकला ओलीको आत्महत्या दुरुत्साहनको आरोपमा पक्राउ परेका दिपकलाई जिल्ला अदालतले पौष २९ गते साधारण तारेखमा रिहा गरेको हो । 

घटनाको अनुसन्धान सकेर मुद्दा अदालतमा बुझाएको र अदालतले दिपकलाई साधारण तारेखमा रिहा गरेको जिल्ला प्रहरी कार्यालयका सूचना अधिकारी प्रहरी निरीक्षक राजिव श्रेष्ठले जानकारी दिनुभयो । मुद्दाको फैसला भने भएको छैन् । १८ वर्षिया श्रीमती खिमकलाको आत्महत्या दुरुत्साहनको आरोपमा प्रहरीले १८ वर्षिय दिपकलाई पौष ९ गते पक्राउ गरेको थियो । 

श्रीमतीले झुण्डिएर आत्महत्या गरेको भन्दै उनले गाउँलेलाई खवर गरेका थिए । श्रीमतीलाई झुण्डिएको देखेको र जीवितै हुनसक्ने भन्दै आफुले डोरीबाट निकालेको तर श्रीमतीको मृत्यु भइसकेको बयान उनले दिएका थिए । उनलाई पक्राउ गरेर प्रहरीले अनुसन्धान थालेको थियो । माइती पक्षले भने खिमकलाले आत्महत्या गरेको नभई उनको हत्या भएको दाबी गरिरहेका छन् । 

यसअघि पनि पटक पटक खिमकला माथि दिपकबाट कुटपिट भएको र मृत्यु हुनुभन्दा एक दिन अघि मात्र खिमकला निलडाम सहित माइत आएको माइती पक्षको भनाई छ । घटनास्थल हेर्दापनि हत्या भएको देखिने माइती पक्षको भनाई छ । दिपक र खिमकलाले गतवर्षको चैत्रमा मात्र प्रेम विवाह गरेका थिए ।