रुकुम पश्चिमको मुसिकोट नगरपालिका वडा नम्बर ७ बाट प्रहरीले पुनः अबैध भरुवा बन्दुक बरामद गरेको छ । वडाको बैरीदहमा उनिउको बारीमा लुकाएर राखिएको भरुवा बन्दुक बरामद गरिएको प्रहरीले जनाएको छ । गोप्य सूचनाका आधारमा जिल्ला प्रहरी कार्यालयबाट प्रहरी निरीक्षक बिष्णुप्रसाद श्रेष्ठको नेतृत्वमा खटिएको ७ जनाको प्रहरी टोलीले आज बिहान ३ नाल भरुवा बन्दुक बरामद गरेको बताइएको छ ।

उक्त हतियार जिल्ला प्रहरी कार्यालयमा राखिएको र अनुसन्धान भइरहेको प्रहरीले जनाएको छ । सोमबार राती मात्र प्रहरीले वडा नम्बर ७ कै ग्याम्माखोलाको एक ओढारबाट ७ नाल भरुवा बन्दुक बरामद गरेको थियो । बारम्बार बन्दुक फेला परेपनि बन्दुक राख्ने व्यक्ति भने अहिलेसम्म पक्राउ पर्न सकेका छैनन् ।