रुकुम पश्चिमको मुसिकोट नगरपालिका वडा नम्बर १ को गिल्वाङ नजिकै भएको गाडी दुर्घटनामा ६ जना घाइते भएका छन् । खलंगाबाट बाँफिकोटको छिनखेत तर्फ जाँदै गरेको इन्टरनेट सेवा प्रदायक वल्र्डलिंक कम्युनिकेसनको कर्णाली प्रदेश २००१ च ०४१३ नम्बरको सानो गाडी सोलावाङ बालुवा सडक खण्डको गिल्वाङ नजिकै नेपानेमा दुर्घटनामा परेको छ ।

उक्त दुर्घटनामा परी ६ जना घाइते भएको जिल्ला प्रहरी प्रमुख प्रहरी नायव उपरीक्षक नवराज पोख्रेलले जनाकारी दिनुभयो । उहाँका अनुसार पाँच जनाको अवस्था गम्भीर रहेको छ । जसमध्ये तीन जनालाई जिल्ला अस्पताल सल्ले ल्याइरहेको उहाँले बताउनुभयो । अन्य तीन जनालाई पनि उद्धार गरेर अस्पताल ल्याउने प्रयास भइरहेको उहाँको भनाई छ । घाइतेको विवरण खुल्न सकेको छैन । गाडी सडकबाट करिब दुई, अढाई सय मिटर तल खसेको बताइएको छ ।