विभिन्न अल्ट्रा ट्रेल रेसमा भाग लिन स्विट्जरल्याण्डमा रहनुभएका रोल्पाको थवाङका मनकुमार रोकाले एकपछि अर्को सफलता प्राप्त गरिरहनुभएको छ । भर्खरै सम्पन्न १० किलोमिटर दुरीको ४९ औँ ओव्रोंनाज रामब्रेट रेसमा उहाँ दोस्रो हुनुभएको छ । विश्वका विभिन्न देशका ३ सय धावकले भाग लिएको प्रतियोगितामा रोकाले दोस्रो स्थान प्राप्त गर्न सफल हुनुभएको हो । उहाँ प्रथम हुनबाट मात्र ३ सेकेन्डले पछि पर्नुभएको थियो ।

उहाँले निर्धारित दुरी १ घण्टा ३ सेकेन्डमा पुरा गर्दा प्रथम हुने धावकले १ घण्टामा दौड पुरा गरेका थिए । तेस्रो हुने धावकले निर्धारित दुरी पुरा गर्न १ घण्टा १० मिनेट ४९ सेकेन्ड लगाएका थिए । मनकुमारले स्विट्जरल्याण्डमा यो सहित तीन वटा प्रतियोगिता खेलिसक्नुभएको छ । सुरुको प्रतियोगितामा सातौँ स्थानमा रहनुभएका मनकुमारले दोस्रो प्रतियोगितामा तेस्रो स्थान हात पार्नुभएको थियो ।

अब यही महिनामा ७० किलोमिटर दुरीको विश्व सिरिज रहेको र उक्त प्रतियोगिता पनि खेल्ने उहाँले बताउनुभयो । अहिलेसम्मको तयारी उक्त प्रतियोगितामा केन्द्रित गर्ने र उक्त प्रतियोगितामा थप राम्रो गर्ने उहाँले बताउनुभयो । मनकुमारलाई ट्रासिस यांकी रनिङ क्लब अफ स्विट्जरल्याण्डले विभिन्न प्रतियोगिता खेलाउन स्विट्जरल्याण्ड लगेको हो ।